Narichten ut ´n Vereen Startseite Plattdüütsch leevt
Sofia Harder
Sofia Harder 15.11.2006 bi Plattdüütsch leevt, JeKaMi för "Dat Blatt
op Platt"
Sofia Harder in´t Johr 2000
Mien Naam is Sofia Harder un ik bün in dat Johr 1981 in
Hamborg - Eppendörp born. Im Momang gah ik in de dörteihnte Klass op dat
Wirtschopsgymnasium in Harborg.
In mien Freetied speel ik Klaveer, schrief lütte Geschichten op Platt un
Hochdüütsch, leest geern Böker un malen do ik ok.
To dat Plattdüütsche bin ik dör de
School kamen. As ik in de teihnte Klass weer, möten wi een Wahlpflichtfack
utsöken, un dor hebb ik mi för dat Plattdüütsche interesseert. Dor hett dat
ünner annerem een plattdüütschen Leeswettbewarv geven, wo de Ennutscheedung
in dat Ohnsorgtheater weer. Bi düssen Wettbewarv hebb ik den iersten Platz in
mien Öllersgrupp mokt.
Twee mol heff ik ok mitmokt bi de Lesewettbewerb "Schoolkinner leest
Platt" von Vereen Plattdüütsch leevt. Dorbi heff ik ok wunnen.
Mi hett dat Plattdüütsche so veel Spooß mookt, dat ik dat för mi sülven so
wieder drieben hebb.
Ik hebb denn af un to för "Plattdüütsch leevt" vörleest un een Dag
bün ik fraagt worrn, of ik nich för "uns Blatt" lütte Dööntjes
schrieven wull. Bit to de Tied heff ik aver noch nie nich op Platt schreven,
ober man hett mi veel Moot makt un mi hett dat ok bannig veel Spooß makt.
Nu hebb ik graad een Praktikum bi de NDR - Hamborg Well 90.3 makt, un hebb dor
ok veel plattdüütsche Aktschoonen mitkreegen.
För mien Tokunft wünsch ik mi, dat ik
noch veel mit de plattdüütsche Spraak to doon heff un möch nah dat Abitur
villicht sogor Germanistik mit de Swoorpunkt Nedderdüütsch Spraak studeern un
denn ann leevsten bi ´t Radio or Feernsehn anfangen.
Un een lütt Droom weer dat ok för mi, in´n Ohnsorg - Theater mittospeelen.
Ik hoop, dat sick mihr junge Lüüd för de plattdüütsche Spraak interesseeren!!!
Ji köönt all dorto bidregen, dat düsse scheune Spraak nich eenes Daags
utstarben deit!
Denn: Plattdüütsch leevt!